O Museo do Mar nace en 1969, como froito da grande paixón do mestre D. Francisco M. Rivera Casás por recoller e coleccionar obxectos relacionados co mar. Dende os seus inicios pretende reflectir a vida mariñeira da costa lucense e amosar a súa riqueza biolóxica e etnográfica.

O edificio que serve de sede ao museo construíuse no ano 1931 para albergar a Escola Unitaria de San Ciprián, grazas á doazón de 60.000 pesetas de Don José M. Fernández Montenegro, emigrante en Arxentina e da súa esposa, Dona Manuela Goñi Maiste, quen cumpriu unha cláusula testamentaria do seu marido na que se dispoñía o diñeiro para construír o edificio.

O edificio do colexio foi construído sobre un solar de 1350 m², cedido polo Concello de Cervo. Ao tratarse dunha escola mixta, o edificio foi construído de acordo cos usos da época, con dúas portas de acceso na fachada, dúas aulas moi grandes, e outras dúas portas na parte posterior de saída aos patios de recreo, un patio para os nenos e outro para as nenas que estudaban e xogaban separados por un muro.

Construído en pedra de cachotería con cercos de canteiría de granito en portas, ventás, cornixa e esquinas do edificio. A cuberta é de lousa, con tellas de cerámica como remate. Accédese ao mesmo por unha ampla escaleira de canteiría de granito.

Foi remodelado e ampliado pola Diputación Provincial de Lugo sendo Presidente Don Francisco Cacharro entre 1993 e 1994, sendo inaugurado o novo museo o 12 de agosto de 1994.

San Ciprián é terra de mar. É unha península, unha língua de terra que sae sen medo ao encontro do mar. Duro, perigoso, bravo, mais tamén unha porta aberta a novos mundos. Mundos descoñecidos, cheos de historias para seren contadas.

O noso Museo do Mar garda o reflexo da memoria do seu pobo, e é, sen dúbida, o seu mellor narrador. Estamos ante o museo do mar público máis antigo de Galicia e o máis accesible.

Por iso, o Museo do Mar de San Ciprián quere chegar a ser un modelo de museo accesible, adaptado, didáctico, aberto a todos os sentidos, inclusivo e con plena atención á diversidade, capaz de eliminar todas as barreiras de comunicación cos seus visitantes.